政壇：貪曾幼子黐富二代送茅台有乃父之風

「貪曾」前特首曾蔭權爵士幼子曾慶淳一向愛攀上流社會，埋「富二代」堆，近日就加入咗雲集政商界二代嘅「菁英會」。前晚佢以第十八期新丁身份現身菁英會聖誕派對，仲送出一支值逾三千港元嘅貴州53度典藏茅台酒畀大會抽獎。咁多禮物唔送，何解要送酒呢？仲偏偏係佢爸爸貪曾愛好嘅茅台酒添！

為引人注目，曾慶淳（前左）黐上「二撇雞」鬍鬚扮晒嘢。

遇見靚女，曾慶淳（右）主動上前搭訕。

貪曾向來好酒，曾聲稱捐出一批紅酒外，仲被揭喺卸任前將一批貴州茅台酒股份有限公司送贈、約值一百八十萬元嘅「香港回歸十年紀念珍藏」貴州茅台酒，秘密搬去前行政長官辦公室，有私吞部分公家美酒之嫌。既然佢爸爸貪曾藏酒咁多，曾慶淳隨手拎支去抽獎都話咁易啦！

周圍搭訕靚女四散

送禮都諗過度過嘅曾慶淳，喺派對上千方百計引人注目，黐「二撇雞」鬍鬚扮晒嘢，繼而坐埋一邊拎部手機出嚟自拍，認真自戀。自拍一輪後，佢拎起酒杯四圍搭訕，見到靚女就一個箭步上前介紹自己，仲傾到手舞足蹈添。可惜佢身形矮小，班靚女對佢嘅興趣麻麻，應酬一輪後就「閃開」。