政壇：立會走火警 議員求其hea行
立法會尋日進行火警演習，話說中午十二點半，立會大樓餐廳起火，警鐘一響，大樓內嘅職員就急急腳跑出大樓。由於大樓嘅示威區同立法會廣場因為佔領行動而封閉，所以大家要去大樓隔籬嘅添馬公園「避火頭」。不過，因為尋日立會嘅會議唔多，所以只有劉慧卿、「大舊石」石禮謙、謝偉俊、何秀蘭、梁耀忠、WK盧偉國零星幾位議員參與演習。
謝偉俊同盧偉國（前排右一及右二）等議員到添馬公園集合。
後面嘅職員跑緊去安全地點，但梁耀忠（右）就慢慢行。
有議助證件失效恐釀險
雖然係火警演習，但卿姐就一路行、一路滋油淡定咁傾電話；大舊石就攞住啲文件慢慢行，仲話「假o架嘛，使乜行咁快」，就連阿忠都係以散步嘅速度慢慢行去公園。搞到啱啱開完會嘅WK都忍唔住話︰「唔知佢哋係咪因為自己係議員，連火神都怕咗佢？」
呢頭啲議員慢條斯理，另一邊廂有議員助理就懷疑，因為早前秘書處限制佢哋只可以喺所屬辦公室樓層活動，而增加咗佢哋證件出入嘅限制，搞到佢哋張證開唔到走火通道嘅逃生門，最終要靠議員證件先至逃得出「火海」。好彩今次只係演習，萬一真係發生火警，出咗乜嘢意外，後果不堪設想。
雖然有人投訴秘書處限制議員助理喺大樓內活動係草菅人命，但如果唔係泛民主派議員唔守規矩搞到大樓立立亂，又點會有呢啲限制措施呢？秘書處同違規嘅泛民議員都要為可能出現嘅悲劇負上最大責任。
立會秘書處就話，今次火警演習最終有四百五十人去到添馬公園集合點，用咗十四分鐘，全程零意外。而協助今次演習嘅港灣消防局亦有派員觀察，仲話第一批去到集合點嘅人用咗四分半鐘，表現尚可接受喎。之不過，如果真係有人開唔到門，就算跑手都無用，據聞秘書處會跟進事件。
