政壇：鄉局填氹 車位劏舖
位於沙田石門新界鄉議局大樓，耗資約二億元興建，但話說大樓一一年落成至今長期入不敷支，繼年前賣甩九龍塘舊址還債填氹後，大樓專用停車場去年仲增設時租車位賺外快。不過，鄉議局開支咁大，單靠出租場地又點填班鄉紳嘅使費呢？主席劉皇發眼見鄉議局本帳簿滿江紅，尋日即時扑錘研究改建停車場部分車位做地舖出租，有望再「發」一筆填氹。
設計圖片及對白
恐難申改土地用途
鄉議局尋日舉行每月例會，但壞消息接踵而來，先有執委匯報鄉議局位於英國倫敦嘅海外顧問委員會（歐洲聯絡處）被追收三百萬港元營運開支，差餉物業估價署又拒絕鄉議局豁免差餉嘅申請，兼追數過百萬元，加上大樓每月燈油火蠟都坐底使十萬八萬元，莫講話自給自足，就連每月基本開支都捉襟見肘，主持大局嘅發叔都咪話唔頭痕。
會議臨近尾聲，發叔就主動提起既然大樓停車場咁多吉位，建議停車場出入口隔籬、面向馬路嗰邊車位「改裝」做地舖出租，仲即席吹雞成立小組研究改裝車場可行性。不過，政府當年以一千元象徵式租金批出大樓現址，鄉議局根本冇大樓業權，絕對唔能夠隨心所欲，所以大家都為申請改變土地用途傷腦筋，鄉議局想收租撲水睇怕唔容易。
不過鄉議局作為非牟利法定機構，不但坐擁估值三億元嘅商貿靚地，兼獲香港賽馬會資助大樓部分建築開支，惟大樓建成三年來內部甩漏多到離譜，統統都要花錢執漏，依家又要政府通融改建地舖收租，再遲啲真係唔知可以點？
