活化古蹟冇人吼 只怪官僚死腦筋

嗱，有辦你睇o架。三個曾經名噪一時嘅古蹟景點，包括柏林影展得獎電影《歲月神偷》拍攝地上環永利街、動漫迷蒲點灣仔綠屋，同埋婚紗拍攝勝地薄扶林伯大尼修院，家陣風光不再，直情門堪羅雀。先講永利街吖，港府為咗叨光，原本要拆條街，最後都係留低保育，重新修葺，初時的確係威係勢嘅，高峰期每日有逾千人參觀添，可惜家陣一日頂多得三、四十人到訪，人氣不再。

灣仔綠屋一樣唔好得幾多咋，呢幢建築充滿西方色彩，已經有逾百年歷史嘞。當局去年將呢度打造成動漫基地，主意係唔錯嘅，可惜捉到鹿唔識脫角，求其用幾塊展板及一套簡陋影片介紹就算。記者現場所見，每小時不足二十人參觀，有位女士直情悶到瞓着咗，問你服未。

至於伯大尼修院就仲衰，原本係法國外方傳道會碩果僅存嘅三幢戰前建築物之一，極具歷史價值，點知管理不善，博物館連小貓三、四隻都冇，遇着禮堂被人租用，博物館就唔開放，經常搞到市民摸門釘，唔激氣就假咯。

講到呢度，大家一定會問，點解咁好嘅地方會搞成咁o架？答案好簡單，除咗展館場地豆腐膶咁細，最大鑊嘅係，港產官僚眼高手低，志大才疏，展品內容又悶又冇變化，結果咪趕客咯。正如立法會議員話齋，負責監管嘅康文署零宣傳、零推廣、零支援，搞到古蹟死氣沉沉，淪為空城，有人吼至奇喇。

冇錯嘞，外國古蹟往往成為世界知名旅遊景點，既可提升遊客文化修養，又可賺取經濟收益，邊似得香港咁失敗o架。遠嘅唔講喇，淨係台灣都搞得有聲有色，好似國立台灣博物館咁，建於日治時代，經活化後成為旅客必到之地；又好似台北當代藝術館，前身係小學舊址，轉型後成為知名美術館。你話嘞，台灣做得到，香港做唔到，港產官僚無能，吟詩都吟唔甩喇。

咁講喇，港府成日話要搞活化、搞保育，其實最應該活化嘅係港產官僚嘅花崗岩大腦至啱。佢哋一味用死腦筋去搞保育喎，黃金都當係草，盞嘥氣嘅咋，叮！