城中鏡：梁永祥籲演藝生咪搞另類示威
年尾係大專院校畢業禮嘅高峰期，但今年呢個莊嚴嘅典禮卻吹起示威風，唔少畢業學生各出奇招，有人更趁上台領證書時，以各種手勢及行動表達對政制嘅不滿。講起呢股風氣，演藝學院都可以話係「先驅」。演藝學院校董會主席梁永祥（William）話，佢曾經聯同校長一齊搵學生傾，希望佢哋再思考吓。明年底William任期屆滿，佢希望明年畢業禮氣氛可以好啲，學生唔好再用咁另類方式表達不滿。
梁永祥（左）偕太太出席晚宴撐場。
右起：邱詠筠、特首夫人梁唐青儀、陳寧寧及盧高靜芝相見歡。
右起：鄭志剛、陳仲尼及施榮忻齊歡聚。
批不尊重畢業典禮
演藝學院友誼社早前舉行籌款晚宴為傑出學生籌募獎學金，吸引數百名政商界名人出席，包括新世界集團第三代接班人鄭志剛夫婦、全國青聯副主席陳仲尼夫婦、身兼中央政策組顧問嘅友誼社聯席主席盧高靜芝、百仁基金前主席施榮忻等人，現場氣氛熱鬧。
William偕太太一齊出席，佢話唔經唔覺已做咗五年主席，睇住學校培育出唔少成功嘅演藝人士，覺得好開心。不過呢兩年學生喺畢業禮上嘅抗爭行為令佢好感慨，事關佢並唔認同年輕人呢種表達方式，咁做係唔尊重莊嚴嘅畢業典禮。
講番籌款晚宴，遠東集團邱德根孫女邱詠筠係籌委會聯席主席，佢動員廣闊嘅社交網絡，好快就幫手籌到六百幾萬元。知名設計師鄭兆良仲義務設計晚禮服，並由八位名媛擔任模特兒。一眾靚女戴上名貴珠寶行騷，成為當晚亮點。百仁基金副主席陳寧寧亦係籌委會成員，佢話希望籌多啲款項，幫到有心向學嘅學生。
