教育局局長吳克儉(吳得掂)上任之後外訪頻頻,之前已引來唔少質疑。最近,連身兼行政會議成員嘅新民黨主席葉劉淑儀(葉劉)都睇唔過眼。葉劉近日瞄準呢一點,將會在立法會向吳得掂提出質詢,要求佢回答上任至今外訪公幹次數、賺咗幾多飛行里數、入住酒店等級等,好似想捋袖狂砌咁。

設計圖片

要求交代外訪成效

葉劉插政府插到咁出面,唔驚畀人話喺陣營中點火咩?佢似乎冇有怕,而且,過去佢次次落注都好準確,輸少贏多。睇番吳得掂呢個教育局局長,日常工作被批評,又經常以不同理由外訪歐美等地,搞到局內一班公務員谷住道氣。

今次葉劉明射吳得掂嘅外遊「專機」,睇怕教育界、公務員界甚至公共機構等唔少員工都會拍爛手掌,消氣效果直係一流。

最緊要係,佢連串問題之中,特別要吳得掂回應外訪行程對局內工作有乜成效。究竟成效可唔可以量化呢?呢個回覆唔易寫,睇怕吳得掂有排頭痛。

其實公務員對唔少局長都有意見,點解葉劉矛頭只對準吳得掂呢?好簡單啫,俗語都話打狗要睇主人,吳得掂喺問責隊伍中可謂勢孤力弱,政府內部都無乜人撐佢腰,自然成為各方開刀對象喇。

第一手消息請下載on.cc東網iPhone/iPad/Android/Windows Phone Apps