政壇：CY借田少批建制派唔團結
政治世界中，無永遠嘅敵人，亦無永遠嘅朋友。特首梁振英（CY）曾經杯葛自由黨黨慶，尋日雙方暫時放低分歧，自由黨獲邀到禮賓府同CY共進午餐，因要求CY落台而被撤銷全國政協嘅自由黨前黨魁田北俊都有出席。話就話「破冰午餐」，但聽聞成餐飯都劍來刀往，好似高手過招咁精彩。CY更趁勢同田少講，希望建制派要學吓泛民咁齊心，唔可以自己顧自己喎。
籲學泛民口徑一致
CY話，泛民派逢親有事，二十三位泛民議員都會即刻彈出嚟回應，就算立場唔同都會口徑一致。但建制派若要發聲明，雖然聯署冇問題，但唔係次次都企齊人，部分人更企一陣就走人。邊啲人早走？答案呼之欲出喇！不過話時話，除咗自由黨之外，建制派中亦有唔少人無晒影，唔通CY係想借口話田少，暗批建制派唔夠團結？
