政壇：泛民疑轉軚撐政改 大舊爆人人自危
特首梁振英話正爭取數名泛民主派議員支持政改方案，以完成歷史任務，咁係咪有個別泛民轉軚呢？人民力量嘅陳偉業（大舊）爆料話，有傳政府祭出威逼及利誘撒手鐧游說部分泛民議員轉軚，誘餌包括正、副局長職位或保送議席，威逼嘅就係不外乎金錢與女人等「黑材料」，搞到泛民之間人人自危，擔心被爆大鑊。照計目前最驚青嘅一定非李卓人同何俊仁莫屬，前者被揭發袋咗壹傳媒老闆肥佬黎嘅政治獻金，後者又公然睇模艷照。
梁繼昌否認會在政改一事上轉軚。
白鴿黨本月選主席
立法會要三分之二票數通過政改方案，淨係建制派四十二票係唔夠嘅，最少要多泛民五票先可過關，即使主席曾鈺成投埋票都仲差四票。咁一早話咗要真普選嘅泛民二十六人邊個會轉軚呢？外傳大熱人選包括逐步退隱嘅公民黨湯家驊、會計界梁繼昌、資訊科技界莫乃光同被指係「隱性」建制派嘅衞生服務界李國麟。
我哋問過相關人士，泛民眾人無不成為驚弓之鳥，爭住否認其事，梁同莫堅拒轉軚。
白鴿黨更有人叫政府死心，話佢哋六票唔會變喎。白鴿黨本月將會選舉新一屆領導層，主席嘅競選人包括現任主席劉慧卿、南區區議員區諾軒同立會議員胡志偉等，選舉後黨內路線同工作有冇變化，真係要睇真啲。
