立法會議員工作瓣數好多，有啲議員做少啲功課、唔熟書就好易出醜。尋日係立法會議員定期同申訴專員舉行會議嘅時間，原本係畀申訴專員向議員簡報工作概況及交流，點知申訴專員劉燕卿（Connie）到立法會「執勤」，卻遇上議員嘅離題挑戰，譬如民主黨黃碧雲（一舊雲）竟然問公署，會唔會調查警方點樣處理佔領區嘅清場行動，亦有議員勁呻區內屋邨冇位貼海報嘅感受。歷時個幾鐘嘅會議，好似議員嘅申訴大會咁，令人啼笑皆非，亦對議員嘅工作擰晒頭。

設計圖片及對白

藉機申訴議員利益

一舊雲尋日好離譜咁問，監警會就佔中收到超過三萬宗投訴，問公署會唔會調查警方點樣處理清場，以及點樣監察警察投訴科同監警會。聽完問題嘅Connie冇好氣咁話，專員無權監察警方。其實，警方嘅監察機構係監警會，作為監警會成員嘅一舊雲竟然會唔清楚？係咪太離譜呢？定係佢根本搞唔清申訴專員公署究竟可以查邊啲機構呢？

工黨嘅何秀蘭就關注房署對屋邨張貼海報似乎收緊咗，建仔嘅陳恒鑌亦打蛇隨棍上，話自己嘅海報雖然唔涉及敏感議題，但依然冇位貼，原因係區內屋邨貼滿晒區議員海報。佢曾經為此向房署投訴，但署方回覆指空間有限，要用優先次序劃分。於是佢第二個月早早霸位，但區議員嘅海報仍然佔用咗好多位置，令佢非常火滾。議員似乎係借機會申訴議員利益喎。

議員離題，主席梁君彥卻似乎不以為意，到工聯會陳婉嫻時，佢只係裁定議題「唔關專員報告事」，但繼續畀佢發問。嫻姐就話，黃大仙區議會投訴立法會冇用，處理唔到該區問題，例如該區要求設立急症室好耐，但拖咗幾十年仍未成事。呢啲唔係應該追問政府咩？議員係咪掛住幫自己出氣，搞錯對象呢？

第一手消息請下載on.cc東網iPhone/iPad/Android/Windows Phone Apps