窮人蝸居天台屋 醜聞唱到天下知

件事係咁嘅，英國廣播公司記者親身探訪深水埗天台屋貧窮戶，指天台屋用鐵皮搭建，細過一個泊車位，連張床都放唔落，男住戶要鋪報紙席地而睡，加上七戶共用一個廚廁，連窗都冇隻，侷促到令人抖唔到氣。外國記者最後以「隱形天台貧民窟」嚟形容呢啲天台屋，仲話對比起半山區豪宅，簡直天堂與地獄。

香港正正就係權貴嘅天堂，窮人嘅地獄。反映香港貧富懸殊嘅堅尼系數冠絕全球發達經濟體，早就唔係新聞喇，天台屋已算小兒科，至少居高臨下有風景睇吓吖，比比皆是嘅劏房、棺材房、籠屋，環境更加惡劣添，簡直係香港恥辱中嘅恥辱。呢，外國傳媒聚焦本港蝸居一族唔係第一次，前排先至有英國攝影師拍攝本港籠屋情況，照片刊登後震驚世界。外國傳媒仲話，香港LV專門店數目比巴黎更多，證明香港係富裕城市，但竟然有咁多人被迫居於籠屋之內。香港唔止有病，直情病入膏肓喇！

話時話，香港窮人窮到褲穿窿，窮到居天台，咁有錢人又富貴到咩地步呢？嗱，睇清楚咯喎，有國際金融機構發表全球財富報告，二十五個最大富裕人士市場之中，香港過去五年無論財富定富豪人數嘅增長率都係最高，淨係舊年咋，全港擁有百萬美元流動資產嘅富裕人士就多咗近一成，財富增長更接近一成二。仲有呀，本港百萬富翁數目總共有七十三萬二千人，即係十個人有一個大富翁，問你服未。

富者田連阡陌，貧者無立錐之地，就係香港今時今日嘅寫照嘞。難為港府仲沾沾自喜，聲稱貧窮人口首次跌破百萬大關，證明扶貧政策有效喎。如果真係咁有效，點會仲有十幾廿萬人住喺天台屋、籠屋及劏房吖！家陣醜事唱到全世界都知，睇吓港產官僚仲笑唔笑得出吖。

唉，港府無能，政客無良，社會想唔病態都難咯。發展局局長陳茂波一味匿喺屋企寫網誌，呻到葉都落，根本於事無補。因為佔領之亂，港府近日又話要重視青年政策喎，講真，若果連最基本嘅居住問題都解決唔到，乜鬼政策都係盞嘥氣嘅咋，叮！