城中鏡：唐貝詩碌人情卡 搞網售殺出血路
名媛寇鴻萍嘅女兒Lydia唐貝詩大學畢業後，就投身由媽咪投資嘅團購網站，至今已有三年幾管理經驗嘅佢，謙稱仍係喺學習階段，但媽咪已非常放心，將公司業務全交畀佢打理，而佢亦充滿年輕人幹勁，諗法多多，佢深知團購競爭大，所以利用自己嘅人際網絡優勢，從芸芸團購網中殺出血路，佢話：「我之前搞過明星慈善義賣，叫相熟嘅明星捐一啲佢哋用唔着嘅嘢出嚟義賣，既可以做慈善，巿民又買到平嘢，又可以宣傳到網站，真係三贏。」
唐貝詩構思成立網上頻道，邀請明星對談，加入娛樂性令網站更吸引。
目前單身 擇偶謹慎
除此之外，Lydia最近又有新搞作，構思成立網上頻道，由佢邀請明星對談，加入娛樂性令網站更吸引。至於感情方面，Lydia聲稱依家係單身，但承認間中有同異性約會，佢話：「之前有同啲人出嚟玩吓，但仲喺觀察中。」佢話對每段感情都會全程投入，所以發展一段長久關係前會花時間小心選擇，佢舉例話：「可能個男仔會因為好小事，突然發脾氣或者對下屬態度好差，咁我就會好有戒心。」
