城中鏡：自駕遊日賞雪黃進達：新手咪試

由於日圓持續下跌，吸引咗唔少港人計劃聖誕節前後去日本旅行賞雪浸溫泉，但早前日本北海道一間溫泉旅館發生大火，好彩入住港人都無受傷，康泰旅行社董事總經理Jason黃進達都有關注事件，相信今次只係個別事件，港人遊日仍然安全，反而最令佢擔心嘅係新興嘅日本自駕遊賞雪團，呼籲無經驗者切勿亂試。

黃進達呼籲無雪地駕駛經驗嘅港人唔好貿然自駕賞雪。

林凱章（右）同黃楚恒首次合作搞聖誕派對。

廖宜春（右）大嘆新開餐廳遇上佔中損失不菲，旁為福建社團聯會青委常務副主任林智彬。

Jason解釋，其實喺雪地駕駛難度極高。路面濕滑起上嚟，好易跣胎炒車，加上路牌畀大雪遮蓋，前面有急彎或大斜路，可能未必睇到，提醒欠缺雪地駕駛經驗嘅港人，咪貿然起行。

加國吸「才」黃楚恒耍手

講番聖誕將至，福建社團青委主任Stanley黃楚恒同廣東社團青委主任林凱章合作提早搞聖誕派對，佢哋分頭號召兄弟捐禮物、捐錢抽獎，話咁快搞掂。Stanley透露，計劃日內前赴溫哥華，為當地第三間中藥店開幕剪綵。

此外，對於加國以「快速移民」吸引專才，Stanley聽完就耍手擰頭，強調中港兩地機遇更多，相信有關計劃對內地人比較吸引。

同場現身嘅福建社團聯會常務會董廖宜春，提到最近「黑仔」經歷，話說早前喺金鐘開有機餐廳，點知拎匙後翌日就爆發佔領事件，至今每日生意額只得幾百元，大嘆蝕到入晒肉。