SUN搞作：打橫嚟講：報告報告，香港都有大貪官啫！

中國人社會，是帝制式社系，一朝天子一朝臣，今天，揸帥印者，擸權清黨，扶植親信，打壓異己，是必然的基本行為，有如尿急要解手，沒有民主交替的極權專政獨裁國家，就係咁嘅啦！

家吓！大陸肅貪狂潮爆發，聲言老虎烏蠅一齊打，小蟻民無不額手稱慶。

以前，「刑不上常委」之潛規則，今劑，郁周永康來做個缺口，等老百姓擁護新領導施政，其實，最主要係讓政壇對手襯家知驚，請速速歸邊也！

中共中央嗰頭啱啱向外公布會「依法治國」，呢頭卻將周永康案作「閉門審理」，做不透明的事！當然，我哋呢啲「境外」外人，不敢「干預中國內政」。佢哋咁做，一定大把理由嘅！講真，拉周永康去犬決，我們香港本土人也，關人狗事咩？佢點死佢嘅事，但我反而好有興趣想知佢嘅貪贓情況啫！

嗱！報載周永康斂財九百億，係個「虛數」而已！最好具體如早前話徐才厚家中搜出「一噸」重的現金，幾十架車塞唔晒，咁我哋先明o架！又如全中國，任何一條村的副村長家中床下底也收埋二千萬人民幣，咁至有visualo架！

話時話，件件小貪官床下底都收埋幾千萬現金，而大陸又有咁多小官，究竟，中國有幾多間印刷廠印銀紙的呢？銀行仲有無「黑金」擺存o架？

當大陸任何一條村仔副村長都藏有二三千萬黑錢時，那些收人家五千萬的貪官，小事到畀大陸佬笑啦！又如那個貪曾涉嫌「免費」住的大陸樓和收受的洋酒，更是貪小便宜到痹，好可恥！

既然中共中央成日話香港係中國的一部分，唔該佢哋派人嚟依法拉貪官啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府