政壇：搞搞政：撐鳩嗚網友噬小巴 阿毛乃光助紂為虐
呢排旺角「鳩嗚團」夜夜出遊，對區內居民、商戶造成嚴重滋擾，有份申請佔旺區禁制令嘅潮聯小巴站頭更成為「鳩嗚團」必到之地，要求警方抄牌處理小巴違例泊車，另有人喺網上號召聖誕節圍攻旺角同立法會，其實以上兩種行為都唔應該鼓勵，但兩名泛民議員「阿毛」毛孟靜同莫乃光疑齊齊助紂為虐，前者要求警方處理潮聯小巴違泊，隻字不提「鳩嗚團」滋擾民生；後者亦只把重點放喺五千市民聯署停止濫用。立即檢討「有犯罪或不誠實意圖取用電腦」嘅罪名，有關做法係咪令人信服，答案相信呼之欲出！
設計圖片及對白
阿毛同莫乃光最近先後去信立法會交通事務委員會主席「田二少」田北辰同政府當局，要求跟進佔領行動衍生嘅新問題，其中阿毛喺信中話潮聯小巴喺旺角通菜街違泊多年，警方一直縱容，從未認真執法，又話連續多晚，有唔少市民到場要求警方抄牌執法，警方卻反指市民非法集結，對潮聯違法行為視若無睹，因此要求召開特別會議緊急討論此事。
被斥「迫害司機」
田二少話唔想將潮聯申請禁制令同要求召開特別會議兩件事拉埋嚟講，又話小巴、貨車違泊全港都有，單就潮聯小巴違泊而召開會議「有啲怪」。再者阿毛成封信只要求警方處理潮聯違泊，隻字不提「鳩嗚團」滋擾民生，田二少質疑阿毛係咪持雙重標準。
身為交通事務委員會委員嘅工聯會王國興亦批評，阿毛嘅做法落井下石，「無非都係幫非法集結者迫害小巴司機」，反建議阿毛真係關心交通問題，應該先叫阿毛所屬嘅公文袋撤出佔領區，拔走佢哋喺佔領區嘅旗幡，唔好喺度做埋啲無謂嘢！
對於莫乃光批評當局唔提交涉及不誠實意圖取用電腦個案資料，質疑係咪有乜隱瞞，王國興批評莫乃光做法不負責任，分分鐘誤導市民以為有關網上號召嘅違法行動係合法，希望佢唔好再幫示威者留難警方。
