政壇：葉建源倡講古仔救中史

眾所周知，中國歷史源遠流長，唔同朝代各具特色，但過去中史呢科畀人要死記硬背嘅印象，令唔少學生卻步，立法會教育界議員葉建源話，其實老師用「講古仔」形式教中史，學生就會易啲消化，當年佢讀書時就係因為老師呢個教法，令佢對中史產生濃厚興趣。

葉建源話教中史以「講古仔」形式，學生較易消化理解。

唔止咁，葉建源話之後到佢自己為人師表時，教中史科時都照辦煮碗，一於「講古佬」上身，當中史係一個古仔咁講。佢認為如果老師教得好，中史科喺初中階段可以吸納好多粉絲，年輕一輩可以好好認識祖國，了解國家喺幾千年嚟點演變，仲可以領悟唔少做人同管治嘅道理。

不過，依家文憑試報考中史嘅學生人數買少見少，葉建源講到呢度都好無奈。其實，如果多幾個中史老師學吓「講古仔」呢招，話唔定可以令中史科「起死回生」。