再有高官講英文時疑亂晒龍！發展局局長「波波」陳茂波尋日下晝五時許，出席沙中線古蹟保育方案記者會，本來一直都正正常常，不過唔知係咪一時唔留神，波波用英文回答傳媒提問時，一度將沙中線嘅英文名稱，用廣東話直譯為Sha Chung Sin。

陳茂波一度將沙中線嘅英文名譯錯做Sha Chung Sin。

不過，波波反應都算快，當講到個「線」字時就知唔對路，即時改口用番正確嘅沙中線英文名稱，即Shatin To Central Link。有記者其後再用英文要求波波答問題時，波波寧可先用中文答一次，之後先再答英文「補飛」。

行政會議秘書處晚上六時許出稿，波波現身記招前，原來同一批行政會議非官守成員去大嶼山考察最新發展，期間一齊坐船視察屯門至赤鱲角連接路工程、大澳等地，波波嘅恤衫一度「企領」保暖，唔知同之後疑講嘢亂晒龍有冇關呢？

第一手消息請下載on.cc東網iPhone/iPad/Android/Windows Phone Apps