政壇：周一鑊厚顏做博士
人稱「廢官」嘅食物及衞生局前局長「周一鑊」周一嶽，「翻閹」出任平等機會委員會主席以來，多次想為自己同平機會擴權，又懶理早前展開歧視條例「四合一」檢討諮詢嘅眾多爭議，尋日仲若無其事接受公開大學頒授榮譽博士學位，真係非常之厚面皮。據知身為性傾向條例學校關注組召集人、學民思潮召集人黃之鋒嘅父親黃偉明事先張揚唔認同公大呢個做法，可惜尋日無現身踩場，否則周一鑊更加面懵懵無處可逃。
設計圖片及對白
講番今次公大畢業典禮，相比之前多間大專院校畢業禮畢業生多次舉傘「挑機」，全場只出現三把黃傘，象徵支持佔領行動嘅黃絲帶加加埋埋十隻手指數得晒，唯一較引人注意係互聯網科技榮譽電腦學士袁智衡掛住黃絲帶喺心口，撐住黃傘咁上台拎畢業證書，一度引起在場畢業生一片呼聲同掌聲，不過公大校長黃玉山無倣效浸大校長陳新滋拒頒證書，照樣向佢頒發證書，令畢業禮喺無風無浪下順利結束。
黃玉山籲停絕食離場
另一萬眾期待嘅場面亦無出現，就係黃玉山同公大學生黃之鋒無正面交鋒，繼續避而不見對方，其中唔似其他學聯中人率眾到所屬大學示威，黃之鋒無現身畢業禮踩場表達意見，唔知同早前絕食逾一百小時要多啲休息，或者要同學聯傾應對金鐘清場部署有冇關。
另一邊廂，黃玉山亦無公開到金鐘佔領區同黃之鋒傾偈，尋日再被傳媒追問時都唔肯透露會否親自探望對方，亦唔肯講會唔會發一封公開信勸黃退場，強調有同事落過佔領區睇學生，自己亦都寫過信，覺得學生係時候停止絕食同離場，由此觀之，似乎「雙黃」喺佔鐘區清場前會面嘅機會，都相當渺茫。
