民航處有數唔追 納稅人見財化水

係咁嘅，本報舊年踢爆民航處使咗超過十五億元購入新嘅空管系統，點知得物無所用，睇得唔用得，啟用日期一拖再拖，由一二年底拖到一三年，由一三年拖到明年底，到時掂唔掂仲係未知之數。原來更離譜都仲有，本報最新獲得新空管系統嘅內部合約文件顯示，民航處竟有錢唔追，任由承辦商魚肉。

合約係咁規定嘅，如果出現承辦商須負責嘅延誤，承辦商要賠錢，若延誤出現喺系統第一階段，每延誤一日賠五萬二千幾，最多賠五百二十幾萬；第二階段每延誤一日，賠三萬四千幾，最多賠三百四十幾萬，即係民航處總共可追回八百幾萬罰款。合約更加規定，除非傾掂數獲港府額外延長交貨時間，否則延誤達到六十日，港府有權終止合約，攞番已付款項。

白紙黑字寫到明，遲交貨要罰款，家陣系統啟用時間延誤三年，民航處冇根據合約追討損失，大喇喇八百幾萬唔當回事，反而再向承辦商追加近九千萬元修補呢個專家眼中「千瘡百孔」嘅系統，你話係咪食錯藥吖。早前審計報告揭露，新系統測試期間出現逾三百項問題，如果勉強啟用，隨時爆大鑊，民航處點止大花筒呀，直頭係草菅人命喇。

叮！連小學生都知，如果買部新手機返嚟唔用得，肯定去退貨或免費維修，邊有人唔退貨不特止，仲不斷使錢去整吖。民航處主動放棄消費者權益，有權唔用，有數唔追，未必係蠢得交關，而係敗家子上癮，根本不當納稅人嘅血汗錢係一回事！

係人都知，民航處敗家醜聞多籮籮，至叻亂揈公帑供自己享受。唔係咩？呢個部門管理鬆懈，設施甩漏，但係供管理層享用嘅康體娛樂設備就一應俱全，包羅萬有，包括專業舞蹈室、超豪「大浴場」、目不暇給「電視城」、勁爆音響「K」房等等，簡直沒有最奢華，只有更奢華；沒有最混帳，只有更混帳。

民航處淪為無王管嘅「獨立王國」，立法會帳委會聽日就有關問題公開聆訊，有議員決定興師問罪，追究民航處處長等官員嘅責任。太一叮拜託議員為民請命，千祈咪放過呢班倒米壽星吖，叮！