城中鏡：「剪」「布」放時間囊 林健鋒十年追兇
香港電台一個不時邀請政治新鮮人出席嘅節目，尋日舉行十周年升級典禮，邀請咗跨黨派合共九名立法會議員同政黨代表到場，同時邀請佢哋將自己覺得有意義嘅物件放入時間囊，等十年後再次打開。適逢議會近年不時出現拉布戰，身兼行政會議成員嘅商界議員Jeffrey林健鋒選擇將一塊布同一把鉸剪放入時間囊，以剪布對抗部分激進派議員拉布行為。
林健鋒（右）將布同鉸剪放入時間囊，寸長毛（左）係拉布元兇。
劉慧卿將寫有「台灣撐香港」嘅頭巾放入時間囊。
袁彌明（右）同麥美娟分別將少女公仔同人大決定文件放入時間囊。
長毛被諷「勤力又好客」
Jeffrey其後更當面揶揄同場現身嘅社民連「長毛」梁國雄，口講長毛「既勤力又好客」，之不過「勤力」係為咗拉布，形容對方為「拉布元兇」；至於長毛「好客」所指係喺最近經常招呼唔少佔領人士去立法會瞓覺。長毛罕有地無即刻反擊，只係好老實咁講咗一句，「我都唔知佢嚟」，又話如果知道一定會叫對方車埋佢，似乎有啲無厘頭喎。
同場出現嘅泛民主派中人，紛紛將同佔領行動相關嘅物件放入時間囊，其中即將同男友結婚嘅人民力量主席Erica袁彌明就將一個少女公仔放入時間囊，寓意今次行動唔似以前由政黨帶頭，而係由一班讀緊書嘅青年人發起。工聯會議員麥美娟就係眾女將中，唯一一個將全國人大常委會八月底政改決定文件放入時間囊，再三強調爭取民主，都唔應該違背人大決定。
