佔領行動嘅後遺症陸續浮現，講緊係位於佔鐘區嘅立法會，據聞立法會保安有固定人手編制，防止立法會被衝擊，因此立會保安人人有份加班，平均都累積十幾日補假，高峰期更有人累積超過二十日，長此下去隨時「積爆假」，惟寄望聖誕、新年等長假期可以盡量清假，否則唔知等到何時先可以有得放假，有人建議不如兩條腿走路，即既可補假，亦可將假期變「補水」，唔知曾親自留守大樓嘅立法會秘書長陳維安會否考慮下呢？

設計對白及圖片

同一時間，立會一眾秘書處文職人員都因佔領行動而不停加班，唔少秘書處職員都想自行選擇「補水」定補假。不過目前立法會只有補假、無「補水」機制，要改變目前做法，就要睇立法會行政管理委員會（行管會）會否決定特事特辦。

講開行管會，聽聞今日除咗討論應否以立法會名義申請禁制令外，仲會討論其他議員違規事項，事關行管會早前推出三招新措施限訪客逗留，之不過有議員仲當耳邊風，講緊嘅係工黨張超雄，佢近日先後兩次帶領佔領人士入立法會沖涼，咁都未算，聽聞有一名議員助理仲離譜，頻頻帶女友人上立法會「過夜」，據知以上兩個事件都「斷正」，惟當場無人聽從保安勸喻，立法會主席曾鈺成最終決定介入事件，睇怕行管會都要有心理準備開個較長會議，一併解決以上奇難雜症嘞！

第一手消息請下載on.cc東網iPhone/iPad/Android/Windows Phone Apps