政壇：肥根同600漁友歎下午茶
立法會漁農界前議員、大埔區區議員「肥根」黃容根離開立法會兩年多，但未有忘記一批漁民老友記，日前喺大埔一間酒樓擺六十圍，合共六百人一同飲下午茶，場面盛大，有老友記見到根叔即刻捉住佢不停「咬耳仔」傾偈，非常老友。
一班大埔街坊見到肥根就不停「咬耳仔」。（互聯網圖片）
肥根話一年一度嘅茶敍搞咗十幾年，係同大埔漁民婦女會、新界漁民聯誼會等幾個團體合辦，無論做唔做議員都應該繼續搞落去，因為可以一次過見番識咗十幾年嘅漁民街坊，即使有啲唔係漁農界選民，但最緊要係同啲老友記聚舊，認真人情味十足。
