政壇：阿Ann一舊雲網上互片

窒對方講嘢唔用腦

立法會會議上周辯論有關「港人優先」嘅無約束力動議，阿Ann突然爆出一句話，如果每年唔係有大批內地尖子來港讀研究生，八大院校嘅研究院可能會執得七七八八。阿Ann嘅言論即時「辣慶」喺理工大學通識教育中心擔任講師嘅一舊雲，批評阿Ann講嘢唔經大腦。

一舊雲尋日朝早喺社交網站再隔空回應，話香港納稅人每年倒貼十幾億畀非本地學生讀研究院，惟佢哋嘅仔女就要自己攞錢出嚟讀副學士、自資學士及碩士、博士課程，加上內地學生喺香港讀完書後未必會留喺香港，認為香港嘅教育資源應該優先用喺港人身上，否則只會血本無歸。

唔知係咪見到一舊雲喺網上發表嘅批評言論，阿Ann喺幾個鐘頭後再喺社交網站撰文，話修讀各院校科學工程系研究院嘅香港學生不足，研究院先至招收內地生，斥一舊雲認為學生不足，研究院應收縮言論係唔經大腦嘅歪論。

阿Ann又話香港院校喺國際學術界之所以有崇高地位同聲譽，內地研究生有一定貢獻，揶揄一舊雲話如果佢真係關心學生，就應炒咗一班淨係識得教唆學生犯法嘅講師同副教授，將錢轉為資助本地大學生，佢一定會大力支持喎。兩人喺社交網站已鬧到面紅耳赤，唔知見面會唔會面左左呢？