縱容電霸撳住搶 利潤管制太荒唐
大家一定記得，前幾年因為油價高企，民間發起「餓死油魔」慢駛抗議行動，好多職業司機響應o架。不過香港又點止油魔橫行咁簡單吖，電霸飛擒大咬、張牙舞爪先至最難頂。消委會建議屋苑及大廈自行發電，實行餓死電霸咁話，有冇得諗呢？
嗱，電力公司年年賺大錢，年年勁加價，早就怨聲載道喇，特別係中電，早前先至放風明年電費加幅逾一成一，嚇到市民O晒嘴。雖然最近轉口風，指增加輸港核電比例後，電費加幅有望下調，但點都好，電費一定加硬嘅喇，爭在加多定加少咋。
面對電霸貪得無厭，消委會最近發表香港電力市場研究報告，批評利潤管制協議容許兩電賺盡百分之九點九九嘅准許利潤，並將燃料價格波動全數轉嫁消費者，對消費者完全唔公平。消委會提出十招應對，除咗開放電力市場，仲破天荒建議當局容許大型屋苑、醫院或大學引入小規模天然氣發電機自行發電，實行自給自足，減低對兩電嘅依賴。消委會仲話，現時唔少大廈已有後備發電機組，主要使用柴油，如果改用天然氣，就可以更加環保嘞。
消委會嘅建議無疑係出於好心，不過講就容易咯，實際上係另一回事。一來後備發電機組係咪足以穩定供電，令人懷疑；二來使用天然氣必須鋪設管道，工程浩大，埋單計數，未必划算o架。經濟學都有講喇，小型生產嘅成本，點都高過大規模生產嘅，所以話，消委會嘅建議可行性不足，盞嘥氣嘅啫。
咁講啦，自行發電雖然難以付諸實行，但消委會出此下策，確實反映出市民對電霸予取予求嘅無奈。講到底，港府成隻紙老虎咁，對兩電監管如同虛設，任由電霸做獨市生意賺到盡，先至係問題癥結所在。正如消委會話齋，要標本兼治，辦法只有一個，就係立法強制兩電開放電網，引入競爭，有競爭咯喎，電費自然有下調空間喇。
冇錯嘞，香港係資本主義社會，有乜理由容許電霸千秋萬代壟斷市場喎。講起就激氣喇，電霸之所以橫行無忌，全拜前朝貪曾政府明益兩電所賜，簡直累人累物吖。無論點都好，現屆政府有責任撥亂反正，趁即將檢討電力市場發展，唔該港產官僚生生性性，做番場好戲，唔好再任由電霸撳住搶喇，叮！
