SUN奇古怪：SUN潮語：【吃拿國】
「吃拿國」呢個潮語，係嚟自國內嘅討論區，喺香港並唔常見。因為香港有言論自由、網絡自由，唔會因為一啲敏感詞而上唔到某啲網站。但係喺內地，網民寫嘢就要避開用一啲敏感字眼，以提防被刪文。「吃拿國」其實即係「支那國」嘅普通話譯音。
到底「強國」今時今日強到一個點嘅程度？係咪淨係GDP排到世界第二又或者可以發射太空船去探月咁簡單？當然唔止。英國國會派代表嚟香港，調查《中英聯合聲明》在香港落實嘅情況，香港竟然拒絕英國代表入境，有英國國會議員直指《中英聯合聲明》已經失效，親中報章亦有類似言論。需知道呢份關乎香港前途嘅合約，係一九八四年由中英兩國簽訂，係國際承認嘅法律文書。強國收回香港之後，理論上係要遵守呢份聲明。但係啲英國人實在對中國人太無知。但凡同大陸做過生意嘅人都知，中國人有幾尊重合約，無論佢哋簽過乜應承過乜，到頭來都可以全部推翻，反臉不認人。難為有啲港豬仲覺得英國人可以幫香港爭取真普選。以現屆卡梅倫政府嘅弱勢，又點會為你班遺民得罪「吃拿國」？
喺香港，有好多不承認自己係中國人嘅網民，會直接稱中國為「支那」，稱內地人做「支那人」。呢個係帶有蔑視成分嘅稱謂。因為日本侵華時期，日本人都稱中國為「支那」，所以到咗今日，有人就重用「支那」嚟稱呼中國，以表達中國嘅文明程度仍然非常落後。不過，喺內地「支那」可能係敏感詞，會招來五毛攻擊或被網警刪貼，所以就以「吃拿國」嚟取代「支那」。
「吃拿國」代替「支那」又真係幾傳神，因為「吃拿」有一種又吃又拿嘅意思，即係廣東語嘅「又食又拎」，係相當貪心嘅表現，用嚟形容當代中國人又真係實不為過。「吃拿人」吃了香港拿了好處會輕易放手？畀民主你班香港人？咪玩啦！
