政壇：搞搞政：高官妙論佔領破局 政府跑出贏在肯磨
佔領行動持續兩個多月，期間政府同佔領陣營嘅攻防戰一直未停。有政府高官就以攻打「四方城」妙論解構佔領行動，話政府打持久戰，八圈唔夠，就打夠十六圈甚至三十二圈，靜候民意逆轉嘅食胡好時機，話唔定食番鋪大四喜，一鋪贏番晒。觀近日嘅局勢，民意逆轉，政府喺呢場馬拉松真係有跑出之勢噃。
設計對白及圖片
有關官員話，政府其實做乜都蝕章，皆因佔中三子、雙學及泛民政黨睇實政府嚟打，政府幾次「出銃」都變「全銃」，一家賠三家。好似九二八當日投擲催淚彈驅散群眾咁，第一炮已經出銃畀泛民三家食咗鋪地胡。之後警方屢次施放胡椒噴霧、催淚水劑，又被指出動警棍，可以話係幾次大銃。不過，泛民過去兩月亦曾多次不按牌理出牌，甚至掉番轉出銃畀政府，好似佔領人士衝擊立法會大樓、雙學發動圍堵政府總部等被指「暴徒」嘅行為，都令民意急轉彎，畀政府食番鋪「雙辣」，但三位一體嘅泛民每人夾三分一就已經夠找數，認真抵玩。
泛民拒見好收輸凸
政府深明佔中搞手嘅目標不止於爭取真普選，有「牌品」唔肯反枱清場離開，佔領陣營就密謀逼政府嬲到跳起出錯牌，甚至上演一場血腥鎮壓，咁就中正泛民下懷嘞。不過，政府一路以嚟好克制，好有耐性咁鬥，結果，泛民三家愈打愈「謝」，有人想快啲打完，有人唔想再打落去添。所以話呢，泛民當初若見好就收，都可以「割禾青」有番多少落袋，依家，分分鐘衰收尾輸凸。
