佔中三子早前向警方自首，戴耀廷唔肯認煽動非法集結同煽動非法行為罪。不過，日前佢喺外媒發表文章，就唱淡佔領行動嘅前景，好似早前喺金鐘霸街佔領冇佢份咁，精神分裂之餘，佢又再次煽動市民做不合法嘅行為，呢一次，佢事後認唔認呢﹖

佔領行動持續咗七十日，依家只剩學聯、學民思潮同一眾佔領人士死守，戴耀廷等早已撇咗。不過，戴有新動作，繼早前提出未來半年至少有兩個佔領高危日子，提醒港人再出嚟抗爭後，近日佢又發表文章，形容佔領行動「高風險，低回報」，認為堵塞政府運作比堵塞道路威力大。佢仲呼籲，市民可參與拒絕交稅、公屋租戶延遲交租等不合作運動。納稅人拒絕交稅，有可能面對罰款、甚至被檢控，公屋戶唔交租更可能影響居住資格添，戴耀廷一招未完，一招又起，唔通真係唔搞禍香港唔心息﹖

第一手消息請下載on.cc東網iPhone/iPad/Android/Windows Phone Apps