政壇：鄉紳唱雙簧 寸爆之鋒

發叔忽然扮失憶唔識黃之鋒後，又反問莫錦貴，「之鋒係咪新界人嚟o架」？莫錦貴回應話，之鋒係「城市人」，而唔係沙田友喎。發叔見之鋒原來唔係「自己人」，惟有話見到之鋒咪同佢傾吓囉！

同黃浩銘傾唔掂

佢哋論城鄉時，都講到新界人嘅問題，好似社民連副主席黃浩銘係下禾輋村民，近日仲研究就金鐘禁制令提出上訴。莫錦貴作為沙田鄉頭兼黃浩銘嘅世叔伯，就自爆搵過黃浩銘單對單坐低傾件事，想話勸對方上訴要三思。不過，莫錦貴慨嘆年輕人好有自己想法，始終「傾佢唔掂」宣布放棄。

我哋問番黃浩銘，對方斬釘截鐵否認同莫錦貴坐低傾過偈，仲話「已經好耐冇見佢」，唔明白對方何出此言。黃浩銘亦都話，莫錦貴想同佢傾無任歡迎，但唔好諗住改變佢想法喎，即係無謂嘥口水喇。

講番尋日嘅活動，莫錦貴以沙田鄉委會主席身份成為沙田區議會當然議員，近日就衝出排頭村鄉委會總部，選址禾輋邨開設議員辦事處，尋日開張，發叔例牌畀面撐場，而呢個新辦事處，曾經係立法會工程界議員盧偉國做委任區議員期間，同另一位委任區議員余秀珠嘅聯合辦事處，盧以往同禾輋街坊朝見口晚見面，尋日重遊舊地，趁機緬懷舊事。