佔領拖垮百業 香港隨時沉船
今年係甲午年，風水上話係水火交煎，唔會太平。真係一啲冇批錯o架，呢，佔領死唔斷氣，仲要暴力升級添，日前喺金鐘爆發大規模暴力騷亂，已被清場嘅旺角「鳩嗚團」亦乘機搞搞震，煩不勝煩。太一叮真係好想問吓佔領幕後黑手，係咪唔搞死香港，你哋就唔會停手吖？
嗱，數字唔會呃人o架，統計處公布十月零售業數據，同九月比較，足足下跌一點三個百分點。扣除價格變動後，十月零售業總銷貨量更比九月大幅收窄二點三個百分點添；至於今年首十個月嘅表現咯喎，亦較去年同期下跌零點二個百分點。點解零售業十月表現同九月差咗咁多，唔使問阿貴，咪即係佔中惡果浮現囉。
具體嚟講，受佔中打擊最大嘅係珠寶首飾、鐘錶及名貴禮物，按年大跌逾一成一；服裝鞋履亦唔好得幾多，分別急跌百分之八點八及百分之二點九。正如香港零售管理協會主席麥瑞琼話齋，內地旅客係零售業最大客源，但佔領令內地叫停旅行團，有意大利名牌因為旅客銳減，計劃裁員甚至結業。佔中搞手成日話為香港爭取未來，喂，佔中搞到中小企欲哭無淚，打工仔手停口停，今日都難過，談未來有鬼用咩。
零售業跌跌不休，家陣先係開始咋，仲要跌到何時，跌至乜嘢地步，真係無人知。對於全港逾三十萬名從業員嚟講，佔領簡直係噩夢喇。呢，平時計數一味靠估嘅財爺曾俊華，今次就冇靠估嘞，佢話喎，佔領鬧劇持續，除咗零售、飲食、酒店、運輸及旅遊等行業大受打擊，更令中小企營商氣氛變差，削弱市民消費意欲；而社會不穩亦令投資者卻步，連外國旅客都減少踏足香港，競爭力每況愈下咯喎，隨時拖垮第四季經濟都有之。港府之前已經調低全年經濟增長至百分之二點二，睇怕仲要衰多二錢重咯。
即係咁，佔中牽一髮而動全身，點止影響零售、旅遊、物流咁簡單，金融中心地位不保先至最大鑊。成個社會一池死水，分分鐘仲衰過沙士時期，就算爭取到民主咁又點吖，香港已經玩完嘞。
呢嗱，唔經唔覺又到年尾喇，今年香港夠晒黑仔，到底出年會唔會否極泰來，咁就要睇吓佔領搞手幾時先肯收手，睇吓港府有冇能力平亂。總之一句到尾，七百萬港人坐埋同一條船，自己打沉條船，盞玩死自己嘅咋，叮！
