城中鏡：聖誕遊日熱捧梁高美懿唔跟風

就嚟又到聖誕節，又係旅遊旺季，唔少人都已經計劃好放假出外玩番轉，加上日圓持續下跌，日本自然成為唔少港人嘅外遊首選。不過，日前喺沙田馬場見到馬會大董之一嘅創興銀行副主席兼董事總經理Margaret梁高美懿，佢話聖誕節都有計劃去旅行，但就表明唔會去日本喎。

梁高美懿（右）話聖誕節唔會去日本旅行。

黃永幟（圖）話只會去日本玩，但旗下食肆唔會用日本食材。

杜振源（圖）日前已同葉澍堃一齊去首爾搜羅美食。

黃永幟唔揀日本食材

日圓一跌再跌，年底嘅大阪、北海道及東京團一早爆滿，唔好話去日本旅行，連本地超市嘅日本貨都特別搶手。不過，日圓下跌就吸引唔到Margaret，唔知係咪仲擔心受輻射影響，抑或唔太鍾意行街，佢話寧願約埋啲朋友去其他地方旅行，一齊做吓運動，打吓波仲好喎，真係夠晒健康。

相反，現代管理（飲食）專業協會主席黃永幟就已經去咗日本兩次，佢話嚟緊聖誕節仲會再去，但唔係公幹，純粹自己去玩。不過，旗下食肆就唔會考慮選用日本食材，一來佢哋以中餐為主，二來仍然怕有輻射，所以對食材來源地非常謹慎，確保食客安全。

除此之外，南韓亦都係香港人近年的另一旅遊熱點，好似「快勞夾大王」國際文具集團主席兼行政總裁Simon杜振源咁，就唔需要等到去聖誕節，日前已經同好友兼前高官Stephen葉澍堃兩個人一齊走咗去首爾玩。

Simon經營唔同國家菜式食肆，所以對飲食非常講究，今次純粹去韓國食足四日，莫非有意喺首爾搜羅有潛質嘅美食，然後喺香港開番間韓國餐廳？