政壇：搞搞政：泛民花招阻入工務組 建制派連環開火

樹根疑粗口轟袋巾傑

委員會尋日再次召開特別會議，討論逾期加入申請，袋巾傑已同泛民議員你一言我一語，就十二人嘅逾期加入申請分拆多個表決方案，包括首先處理謝偉俊嘅申請、暫不處理其餘十一人申請、要求欲補位嘅議員旁聽會議三次，先獲准加入，亦有議員要求立即付諸表決。幾個方案未討論，已玩到大家陀陀擰，建制派蔣麗芸隨即大動肝火，狠批會議議而不決、決而不行，行而不果好sissy（娘娘腔），又鬧爆泛民唔好拖拖拉拉，要爽爽快快表決。

另一建制派鍾樹根亦接力開火，以標準諺語瞄準袋巾傑：「未登天子位，先置殺人刀」，向建制派開刀，「畀你做大會主席咪死得人多，畀你做特首香港咪玩完？」樹根又自稱會盡力畀議員加入委員會，更疑似爆粗：「Ｘ，你就唔係，一拖再拖，拖三四次…」要求立即表決。樹根事後否認爆粗，稱當時只係話：「掉返轉你就唔係」。

互鬧完又點呢？終於呢場鬧劇拖到要休會待續，睇怕呢場持久戰唔玩到明年都唔心息。

另外，工務小組早前通過中止待續蓮塘/香園圍口岸工程同欣澳填海規劃研究，由陳家強做局長嘅財經事務及庫務局就去信工務小組，呼籲議員顧及社會整體利益，盡早審議相關建議，當局又認為兩個項目都具迫切性，尤其係蓮塘其中一份工程標書年底會到期，如果未能及時取得撥款，政府可能要重新招標，令工程延誤，成本增加；而工程未能如期喺一八年完成，亦會對香港嘅聲譽造成嚴重破壞喎。