若果前高官要上立法會解畫，通常都唔慌係好事，但世事總有例外。好似前規劃環境地政局局長「蕭公子」蕭炯柱，今早就要去立會出席發展事務委員會會議，蕭公子離開官場後，一直醉心於音樂教育，點解又同發展事務扯上關係呢？原來係同虎豹別墅嘅活化計劃有關。

蕭炯柱今日到立法會講解一級歷史建築虎豹別墅活化計劃。（資料圖片）

話說融合中西建築特色嘅一級歷史建築虎豹別墅，早前獲政府批准納入「活化歷史建築伙伴計劃」，四年後將活化成為「虎豹樂圃」，專責培訓本地中西音樂專才。負責獻計嘅正正係蕭公子，所以佢亦順利成章做埋「虎豹音樂基金」理事會成員，今日就係以呢個身份上立法會講解活化詳情。

當年蕭公子官至規劃環境地政局局長，亦係首批回歸後順利過渡嘅高官，可以話係見證大時代轉變。今日佢以另一身份重返立會，咁啱現時抵達立會又要經過金鐘佔領區，唔知佢途經時，心中又有乜嘢感受呢？

第一手消息請下載on.cc東網iPhone/iPad/Android/Windows Phone Apps