政府擬於長沙灣瓊林街興建數據中心大樓,商務及經濟發展局估計,施工前顧問服務需五千二百六十萬元。顧問服務完成後,該局會再就實際建造工程、施工顧問同監督工作、測試及驗收,以及交付後嘅服務,向立法會財務委員會申請撥款。但泛民主派班議員喺立法會發動不合作運動,乜都拉布,唔知局長蘇錦樑提出這建議,幾時先可以喺財委會攞到撥款?

立法會資訊科技及廣播事務委員會嘅文件指出,各政府數據中心現設喺唔同地點,通常與有關嘅部門同設喺一般辦公大樓。呢啲數據中心喺唔同時間興建,約八成政府數據中心喺空間、電力容量同冷卻效能方面已飽和,需要興建綜合數據中心大樓,令營運更具經濟和成本效益。

商經局又話進行施工前顧問服務,可確保新大樓設計採用業界良好作業模式,更妥善控制成本和品質。顧問服務範圍包括設計新大樓,提供可容納約一千四百個機櫃的數據中心大廳,放置各部門伺服器,同埋重要基礎設施喎。

第一手消息請下載on.cc東網iPhone/iPad/Android/Windows Phone Apps