政壇：亞馬遜來華機械人撐腰
大家時不時會喺電視度見到機械人發明，但就冇點聽到佢地實際應用喺生活。收到消息，原來機械人已滲透咗喺商戶應用之中。美國感恩節後一日，又即係「黑色星期五」，向來都係美國民眾為即將來臨嘅聖誕節掃貨嘅好日子，而近年中國消費者亦會趁美國各大商戶推出折扣優惠，而大手入貨。
為咗應付內地數量龐大嘅訂單，亞馬遜行政總裁貝索斯就利用Kiva機械人（圖）幫忙「執頭執尾」。（資料圖片）
貝索斯
啱啱進軍內地網購市場，並開設物流中心嘅美國最大嘅電商亞馬遜，為咗應對數量龐大嘅訂單，就使用咗Kiva機械人幫忙「執頭執尾」。對於亞馬遜呢股機械人新勢力，作為內地最大電商之一嘅阿里巴巴，聽講也開始感受到威脅添！咦，亞馬遜行政總裁貝索斯聽到阿里咁講，係咪應該興奮呢？
喺2012年，亞馬遜用咗7.75億美元，收購咗一間叫做Kiva Systems嘅自動化物流提供商。而啱啱提到嘅機械人，就係呢間公司嘅產物。而直至依家，亞馬遜旗下嘅10個履約中心，已經添置咗15,000個Kiva機械人。千祈唔好睇少佢哋，一個報告指呢啲機械人每年可以幫亞馬遜慳約4.6至9億美元嘅成本。
可能你會諗，咁佢哋咪同人類爭工做？唔使驚，亞馬遜話今年公司仍然會請8萬個季節工，仲多過舊年差唔多一成半，其中一部分人更加有可能可以做全職添！
