佔領區嘅集會人士遲遲未有退場迹象,而「雙學」學聯及學民思潮日前發動圍堵政府總部,警方當日以警棍驅散示威者,竟然引起泛民主派立法會議員不滿,尋日要求本周內召開保安事務委員會特別會議,邀請警方代表出席解畫,誓要來個大公審。不過,有份參與佔領行動嘅泛民議員提出討論,已經有利益衝突,佢哋唔肯自首不特止,「長毛」梁國雄講嘢畀工聯會嘅KK黃國健「食住上」,竟然發爛渣以疑似「粗口」辱罵KK,唔知佢哋想點呢?

設計圖片及對白

陳鑑林質疑向警施壓

泛民議員涂謹申指摘警方本周日以警棍武力清場,導致多人浴血,要求盡快召開特別委員會討論;工黨何秀蘭亦指警員涉說出挑釁性說話;人民力量陳志全亦質疑,依家政治問題,警棍解決,係咩邏輯;梁家傑更話見到一名青年人話隻腳被警棍打到瘀晒,應盡快開會討論。不過,佢哋作為佔領行動參與者,本身已涉嫌違法,試問依家仲有咩說服力去開會質詢警方呢?

召開特別會議一事,建制派強烈反對,議員陳鑑林指呢個時候討論,想警察放軟手腳執法係不切實際,如果示威者唔係霸住條路、衝擊警方防線,清場就唔會出現,不如叫示威者早啲散Band啦!旅遊界姚思榮就話事件係要討論,但係討論示威者暴力,因為有警察被人打。工聯會郭偉強就話依家叫停,咪即係叫警察綁手綁腳,認為應該喺佔領行動完結後先討論。

會議期間,有人提到明年一月二十七日,警隊一哥將會喺立法會交代本港治安情況,長毛即發難話,佔中係香港頭等大事,係咪應該早啲講。KK就即大聲話,你都話佔中係最大罪案啦!長毛後來就辱罵KK:「你鳩啦!」KK即叫道:「唔好借故講粗口」,長毛話係「鳩嗚」個「鳩」,唔係粗口,會議擾攘四十分鐘,主席最後都定唔到開會日期,鬧劇一場。

第一手消息請下載on.cc東網iPhone/iPad/Android/Windows Phone Apps