垃圾圍城在眼前 為反而反徒添亂

可持續發展委員會日前通過落實「按戶按袋」作為垃圾徵費大方向，主席陳智思尋日促銷方案時警告，三個堆填區只剩五到六年壽命，好快就會飽和，而「三堆一爐」仍爭拗不斷，落實無期，廢物管理問題已經到咗「臨界點」，甚至「死到臨頭」喎。

嗱，係咪死到臨頭，仲要睇過至知，不過有市民就質疑，堆填區就快爆滿，皆因港府多年來冇做好減廢工作，實在難辭其咎。冇錯嘞，港府無論係環保或者減廢，從來都係求求其其，甩甩漏漏，結果咪搞到烏煙瘴氣咯。係人都知，一味靠堆填處理垃圾，唔係長遠之計，當局明知問題所在，但就得過且過，翹埋雙手等運到，有乜法子唔爆煲吖。

就以垃圾徵費嚟講，董建華時代已經提出，貪曾時代得個噏字，現屆政府上場後至正式提上議程，前後拖咗十幾年，幾乎仲長過中國航天嘅探月工程，問你服未。呢，連陳智思都承認問題一拖再拖，港府有責任喇。

不過咁，垃圾問題積重難返，港府無能固然難辭其咎，而政客阻頭阻勢同樣罪責難逃。立法會財委會連續幾個星期審議「三堆一爐」撥款申請，議員吵吵鬧鬧，爭拗不休，有人發言近二十次之多，結果爭拗咗十幾粒鐘，仲未能完成表決，究竟可唔可以過關，預料最快都要年底至可以揭盅喎。所以話，呢班政客唔止浪費公帑，簡直靠害香港。

公道自在人心，政客一味拉布，有破壞冇建設，連前天文台台長林超英都睇唔過眼，批評議員未有發揮議決嘅作用，令社會冇流動，形成「瘀血社會」。佢仲話，源頭減廢要由市民主動，政府可以做嘅只係宣傳喎。

其實，減廢人人有責，市民固然要承擔，政府更加責無旁貸，絕對唔可以淨係負責宣傳o架。試諗吓，如果當局一早搞好源頭減廢及循環回收，堆填區又點會咁快爆滿吖？如果港產官僚唔係管治混亂，政客又點會有藉口拉布吖？無論點都好，廢物處理係所有香港人嘅事，徵費又好，回收又好，最緊要理性討論，唔好為反對而反對，如果唔係，香港盞變成臭港嘅咋，叮！