潮語「特區城管」係直斥嗰啲低水平嘅警察，尤其最近旺角嘅行動，有年輕情侶路過旺角，懷疑畀一名警司用警棍狂扑後頸，事件引起非議。

香港警察，喺回歸前叫皇家香港警察，香港人一直以嚟對警察嘅形象好正面。呢啲正面嘅形象並非歸功於警隊實質嘅工作，而係因為自從七十年代末八十年代初開始，一系列嘅電視劇同電影作品，大多以警匪正邪對決為主流。港產片或電視劇裏面嘅皇家香港警察，喺《新紮師兄》梁朝偉、劉青雲，喺《嫉惡如仇》嘅李修賢，喺《警察故事》嗰個敢於抗命都要將歹徒繩之於法嘅陳Sir……當然仲有《逃學威龍》同《咖喱辣椒》呢啲幽默但又正義嘅代表。三十幾年嚟，雖然香港警察好似冇乜實質建樹，但係由於電視、電影長期建立嘅形象工程，加上警隊本身都循規蹈矩，專業服務市民。所以一直港警形象喺市民心目中都相當正面。可惜好境不常，由「黑影論」、八十七枚催淚彈到協助執行禁制令，佢哋已經畀部分市民稱為「特區城管」！

有建制派議員話因為係警察壓力大，先會做出呢啲事，吓？壓力大就可以亂打人？聽講警察係有糧出，乜壓力唔係工作一部分咩？如果工作壓力大就可發洩打人，咁我相信香港好多老闆主管，可能隨時畀人活活打死，你話喺咪先？

第一手消息請下載on.cc東網iPhone/iPad/Android/Windows Phone Apps