政壇：搞搞政：黑英智思推「堆爐」 憂拉布變瘀血塞港
政府提交嘅「三堆一爐」撥款申請，畀泛民主派立法會議員「拉布」拉咗成個幾月，熱心環保嘅天文台前台長林超英（黑英）好擔心，直言長此下去，香港遲早變為「瘀血社會」。可持續發展委員會主席陳智思（Bernard）都幫把口，話三個堆填區就快爆滿，但焚化爐都仲未起，垃圾問題已經「死到臨頭」。兩個環保推手一唱一和，目的都係快手快腳清垃圾。
設計圖片及對白
「盼社會流動如血」
黑英尋日出席電視台節目時話，對現時立法會慣性「拉布」嘅情況感到好可惜，佢話議員職責係議決事項，一係通過、一係否決，等社會好似血咁可以繼續流動，「否則啲血唔流通就會瘀」，擔心議員再係咁「拉布」落去，遲早搞到香港變為「瘀血社會」喎。
Bernard尋日都接受電台訪問，原本講緊下月交畀環境局嘅垃圾徵費報告內容，但佢都喺開場白評財委會審議三堆一爐，佢話，三個堆填區喺五、六年就會爆滿，焚化爐都仲未起，垃圾問題迫在眉睫。話鋒一轉，Bernard又推銷委員會建議政府以「按戶隨袋徵費」，估計三人家庭每月垃圾費約要三十至四十四元，但係港府會設三年過渡期，畀未準備好嘅住戶可以攤分整幢大廈嘅垃圾費先。
