政壇：伍婉婷繪巨畫為佔銅紓壓
灣仔區議員伍婉婷（Yolanda）尋日喺銅鑼灣選區，同一眾街坊玩創意巨畫，佢話，舉辦呢個活動，係希望透過創新嘅街頭活動令大家放鬆啲，冇咁大壓力喎。
伍婉婷同坊眾齊玩巨畫填色，趁機鬆一鬆。（互聯網圖片）
佢哋尋日喺百德新街街頭玩Art Jamming，隔籬就係銅鑼灣佔領區，Yolanda口中嘅壓力大家心知肚明喇，呢次活動係由區議會同民間團體合辦，大會準備咗六幅十八呎長嘅大型畫布，由民間團體邀請藝術家先勾勒好框架，再由大小朋友自行填色加以創作。Yolanda話，佢以前都喺辦事處搞過類似活動，今次再搬出街頭，大家都玩得好開心。
