政壇：「波兒」陳天行雙喜臨門
發展局局長陳茂波（Paul）夫婦早前捲入誹謗訴訟，經常現身法院，尋日佢哋步入高院，二人全程不但笑逐顏開，仲同親友滿場飛合照添！原來「波兒」陳天行（James）尋日喺高院正式獲委任為執業律師，未婚妻亦有現身捧場。Paul更透露兒子年底就做「老襯」，據知未婚妻係James喺牛津大學嘅同學，可謂雙喜臨門。
陳茂波（右）同太太許步明（左）對兒子陳天行（中）做執業律師好感動。
正式成為律師嘅James就讀牛津大學埃克塞特學院（Exeter College）法律系，回港後喺港大法律學院修讀法學專業證書課程（PCLL），現正喺全球知名嘅富而德律師事務所工作。無獨有偶，康泰旅行社董事長黃士心孻女康莉（Connie），尋日亦獲法庭接納做執業律師，同James更係港大同班同學添！
基層出身、未曾出國留學嘅Paul眼見兒子成材不禁感動到眼紅紅，但就話兒子只係展開人生一個新階段，寄語要做對社會有貢獻的事，可以自立搵到食就得喇。至於會否就誹謗案上訴，Paul就話暫時未決定。James就稱資歷尚淺，唔會考慮喇。另一個律師老竇黃士心就話，佢嘅三個仔女都鍾意讀書，但希望仔女唔好畀自己咁大壓力。
