立法會復會後，大小會議唔係流會、取消，就係拉布、開咗等於冇開，議會工作慢吞吞，社會怨氣愈來愈大。上周四，立法會扶貧小組委員會又因為唔夠法定人數而流會，事後緝兇，原來幾位泛民主派立法會議員報咗名話要開會，點知就「放飛機」，一個又一個甩底，當中，民主黨（白鴿黨）嘅何俊仁（AV仁）同工黨主席李卓人更有扶貧得把口之嫌。

設計圖片及對白

AV仁同李卓人（阿人）分別解釋話要出席「早餐會」同開會而遲咗喎，據聞，原來佢哋當日去咗政務司司長林鄭月娥官邸進行早餐會，席間傾政改及佔領問題。泛民早前曾揚言為杯葛政改諮詢，依家就為咗見高官傾政改而懶理扶貧問題，除咗再次顯示泛民「講一套做一套」嘅一貫作風外，亦可見佢哋對扶貧工作究竟有幾投入。

揚言不合作 轉頭傾政改

其實泛民早就揚言發動不合作運動、仲要杯葛政府第二輪政改諮詢添，點知上星期四就急急同林鄭月娥傾政改問題，呢次早餐會嘅代表包括AV仁、阿人、泛民「飯盒會」召集人、公民黨黨魁梁家傑及黨友湯家驊，仲有公共專業聯盟梁繼昌（Kenneth）。而民協立法會議員馮檢基就因為擔任扶貧小組委員會主席，所以要主持當日朝早會議，因而冇份食早餐。

唔講唔知，除咗Kenneth之外，出席早餐會嘅四位泛民立法會議員都係扶貧小組委員會成員，AV仁同阿人今次將扶貧拋腦後，基層市民心冷之餘，亦好有諷刺味道，事關泛民喺立法會「拉布」時成日口口聲聲話要優先處理民生議題，要求政府調動議程，依家佢哋就為咗同高官食早餐，點解唔見佢哋調動議程呢？

第一手消息請下載on.cc東網iPhone/iPad/Android/Windows Phone Apps