示威者佔領金鐘 地攤黨佔領中環
有人話，佔領鬧劇好似癌細胞咁，不守法意識不斷擴散，真係講得冇錯o架。佔領遍地開花，金鐘、旺角、銅鑼灣烏煙瘴氣，尋日警方話就話喺旺角清場，可惜場面混亂，衝突不斷。佔領人士無法無天咯喎，自然有人有樣學樣。
呢，有樣學樣嘅咪就係南亞地攤黨囉。每逢周日都會有南亞裔人士喺中環街邊擺賣，以前會有所避忌，擺一陣就閃，但今時唔同往日咯，佢哋唔止擺得光明正大，仲擺足成日添。冇花冇假o架，本報記者現場直擊發現，有人誇張到攤開三米長布幔，展示出售物品；有人搬嚟一箱箱貨物，霸佔成條行人路。行人要經過上址，一係兜路行，一係硬闖地攤陣，搞到怨聲四起！
話時話，南亞地攤黨霸住中環叫賣唔止阻路，有損市容，而且搞到附近商戶雞毛鴨血。喺利源東街經營手機配件嘅商戶係咁講嘅，地攤黨猖獗，又唔見食環署執法，令佢嘅生意大跌三成；另一個售賣成衣嘅商戶亦話，地攤黨唔使交租，有牌商戶好難同佢哋競爭，搞到冇啖好食。
咁又係呀，南亞地攤黨本小利大，雖然只係出售十幾廿元嘅貨色，但薄利多銷，正當商戶又點夠佢哋爭吖。唔係講笑，本報記者喺現場統計，其中一個地攤每五分鐘就賣出一套二十元嘅耳筒，兩小時營業額已經接近五百元，小數怕長計，幾好賺o架。
講到呢度，大家一定會問，點解堂堂金融中心會搞成咁？答案好簡單，以前食環署小販管理隊會派重兵駐守，見一個捉一個，但自從佔領鬧劇爆發後，販管隊冇晒影，南亞地攤黨仲唔乘機佔領中環咩。
點解販管隊冇晒影？無他嘅，咪又係多得佔領鬧劇囉。有食環署人員爆料，數月前一名販管隊人員被南亞地攤黨襲擊暈倒，署方大為緊張，決定同警方聯合執法。問題係，自從佔領鬧劇爆發後，幾乎所有警力都集中應付示威人士，仲邊得閒幫手對付地攤黨吖。今年頭九個月，食環署喺上址共有四十一宗檢控，但十月至今，竟然得三宗咁大把，唔係放軟手腳又係乜？
所以話，家陣香港七國咁亂，烏煙瘴氣，好似無王管咁，全拜佔領鬧劇所賜。無論點都好喇，食環署敷衍塞責，實在難辭其咎，唔通冇警方協助，食環署就唔使做嘢？咁不如解散販管隊，由警方出埋佢哋份糧啦，笨！
