政壇：搞搞政：「萬人自首」無期 泛民各黨鬥縮沙
佔領行動持續近兩個月，猶記得佔中搞手當初口口聲聲倡議「萬人自首」，依家據講佢哋最快下月初自首。戴耀廷早前仲揚言要打破同一時間最多人自首嘅世界紀錄，點知講就天下無敵，真到做就大家鬥縮，依家「雙學」學聯同學民思潮已明確表態唔會主動自首，泛民兩大政黨白鴿黨同公文袋對自首不情不願，工黨又有意睇定啲，「萬人自首」真係得啖笑。
設計圖片及對白
綜合各方消息指，「雙學」根本無心跟隨自首，亦唔會自行離開佔領區。最離譜係公文袋，該黨黨魁梁家傑聲言唔會放棄佔領運動，亦唔會提早自首。我哋仲聽聞，公文袋內根本無人想自首，事關有人認為自己無做違法事情，只係行過佔領區或以義務律師身份出現。有社運人士聞言，大罵公文袋「縮骨」，質疑係咪錫住個律師牌照，點名指曾於金鐘大台代表泛民飯盒會發言嘅梁家傑，及曾到旺角佔領區通宵留守嘅黨主席余若薇，都理應走唔甩要自首。
白鴿黨只求「博上鏡」
至於白鴿黨，之前有百多人有份簽佔中同意書，但據聞有意跟隨三子自首嘅人唔多，主要係一批「老鴿」如蔡耀昌、陳樹英，至於另一批人就等清場，咁做目的係務求該黨可以「博上鏡」，無論係咩結果，兩邊都抽足水。至於由李卓人任主席嘅工黨，對於自首問題討論多時，至今仍係意見分歧，有人支持公民抗命概念，有人認為唔應該佔領到最後一刻，但講完一大輪都係無共識。泛民中人對於自首係咪等同認罪都拗餐飽，講咩嘢政治承擔呀，盞笑壞人啫。
