立法會進出口界議員黃定光（象哥）每年都搞大閘蟹宴嘅，尋日佢又再次請食蟹，座上除咗中華出入口商會會長莊成鑫之外，梗係少不了一直被象哥暗捧為立法會議席接班人嘅中出常務會董周浩鼎（Holden），同樣對躋身立法會興致勃勃，仲同傳媒關係唔錯嘅中出副會長許華傑（Michael）就未見，不過，飯局進行期間，Michael突然拉隊現身，中途殺入，究竟有乜景轟呢？

黃定光（右）昨日帶埋力捧嘅接班人周浩鼎（左）一齊參加蟹宴，許華傑就中途入來話要打聲招呼喎。

原來Michael咁啱喺隔籬有飯局，佢知道象哥請傳媒食蟹，特登入來打個招呼啫！不過，象哥懶理Michael踩場，猛讚律師出身嘅Holden好過佢商界出身，可以投放更多時間喺議會，而且Holden經歷多年《城市論壇》嘅磨練，見慣傳媒，對接棒好有幫助喎。聽落句句有骨，擺明衝着商界出身嘅Michael咁喎！

第一手消息請下載on.cc東網iPhone/iPad/Android/Windows Phone Apps