基建發展係政府工作重要一環，立法會發展事務委員會討論嘅議題往往多到講唔完，不過尋日會議就一反常態，頭兩個議程幾乎「無人問津」，尤其係第一個議程，當時討論下年度基本工程儲備基金整體撥款，全場只得建制派嘅盧偉國問咗唯一嘅一條問題，冷場唔得止，點知一問就考起現場來自四個局同十一個署嘅二十二位官員，大家都口啞啞答唔到，結果由財經事務及庫務局打圓場，話後補資料畀議員喎！

究竟盧偉國嘅問題係咪好冷門，或刁鑽呢？睇落又唔係啫，事關佢只係問到，政府過去兩年嘅撥款同實際用量分別係幾多，點知啲官員招架唔住，財經事務及庫務局首席助理秘書長蔡雪蓉就話，舊年同今年嘅撥款差唔多，至於實際金額就要後補資料畀議員，搞到盧偉國面黑黑。咁又係，班議員已經得一條問題，二十幾個政府官員一個都答唔到，真係幾失禮，結果官員們櫈都未坐暖就要走人，其實平時建制派議員通常都好少為難政府，今次竟然考起班官員，好明顯係未做足功課喇！

第一手消息請下載on.cc東網iPhone/iPad/Android/Windows Phone Apps