立法會早前被暴徒衝擊，搞到啱啱先維修好嘅大玻璃門及外牆又被重創，今次衝擊已經係今年第二次，兩次都搞到立法會要取消會議，影響議會工作。建制派紛紛要求立法會加強保安，九月時獲英國英聯邦議會協會邀請，喺本月十八至二十日去咗出席增長帶動發展國際議會會議嘅富貴黨鍾國斌（Felix）都深有體會，呢次佢留意到英國議會入面嘅警察都係荷槍實彈，認為香港都有必要研究係咪參考呢個做法。

設計圖片及對白

今年六月財委會審議新界東北發展前期撥款，大樓外嘅示威者突然衝擊立法會，已經搞到立會門爛牆毀，點知上個禮拜又有一班蒙面嘅示威者去到金鐘佔領區，用鐵馬同磚頭撞爛立法會嘅玻璃，大樓再次毀於暴力示威，其實，當晚立法會內都有幾名保安員，但佢哋手無寸鐵，只能夠眼白白睇住示威者亂衝亂撞。

睇過英國議會嘅保安，Felix話，相比之下，人哋就嚴謹好多，雖然英國街道上嘅警察都冇佗槍，但議會入面嘅警察就荷槍實彈，同香港啱啱相反。佢講笑話，立法會可以參考吓英國，派啲佗槍警員駐守立會，防止發生暴力衝突之餘，大樓內嘅工作人員又唔使擔驚受怕。不過話時話，英國係全球面對恐襲風險最高的國家之一，保安要求梗係唔同喇！

兩避立會衝擊

其實，立法會兩度遭衝擊，Felix都唔喺香港，六月嗰時佢去咗緬甸參觀當地工廠，上星期就去咗倫敦開會，所以，睇到立法會嘅傷勢已經隔咗幾日，唔知算唔算好彩。

除咗Felix外，立法會仲有另一議員莫乃光參加今次會議。立法會秘書處發通告時提到，議員須以自費形式參加會議，但交通及住宿開支可以喺酬酢及交通開支償還款額嘅撥款下申請發還。不過，呢次為期三日嘅英國之旅主要係開會，相信兩位都唔會用好多錢啩？

第一手消息請下載on.cc東網iPhone/iPad/Android/Windows Phone Apps