名校大門八字開 有才冇財莫進來
下學年小一自行派位尋日公布結果，例牌又係有人歡喜有人愁，而笑得最開心嘅，例牌又係有兄姊或者父母喺學校讀書做嘢嘅所謂「世襲生」。計太一叮話齋，「自行派位」呢個名其實有少少誤導，叫「自行繼位」就差唔多。
即係咁，今年有五萬幾個適齡學童參加小一自行派位，當中二萬二千幾人獲派學位，成功率有四成三。冇錯，今年報名人數輕微下跌，成功率十七年以來首次回升，但都係得零點六個百分點咁大把，而喺獲派位嘅學生當中，「世襲生」就佔咗半壁江山，你話係「派位」定「繼位」吖。
咪以為其餘學位按「計分制」分配，普通子弟就有運行呀。不可不知，加分嘅兩大重要指標，一個係有家人曾經喺學校就讀，另一個係住喺學校附近。亦即係話，前者無世襲之名，有世襲之實，只係「繼承順位」冇咁高咁解啫；至於後者咯喎，你知啦，多數名校位於豪宅區，套用一句網語︰呢啲分唔係屬於普通人家嘅。
好嘞，如果閣下既冇好血統，又冇厚家底，貴子弟仲有冇機會入讀名校呢？唔係話冇嘅，同中六合彩差唔多囉。正如有教育界人士指出，自行派位報名人數少咗，係因為雙非家長覺得機會唔大而索性放棄，有幾多人會喺第二階段搶位，仲係未知之數。仲有吖，近年推行小班教學，名校學位買少見少，而「世襲生」又冇減少到，搞到好多學校將原本留畀統一派位嘅學位拎出嚟「填氹」，七除八扣之後，仲有幾多位剩番畀基層學生吖？
所以話啫，無論世襲制又好，計分制都好，都係保護權貴子女，剝削寒門子弟，有人形容呢套「兄位弟及」或「姊業妹承」嘅制度已經唔係教育不公咁簡單，直頭係教育封建，真係一啲都冇講錯o架！
老實講，今時今日嘅香港，早已經係學校大門八字開，有才冇財莫進來o架嘞。有幼稚園搞幾萬蚊天價遊學團，名牌中小學紛紛轉直資，大搞貴族教育。大學就更加唔使講，資助學位長期僧多粥少，港府一直懶懶閒吊吊揈，講到有錢賺嘅副學位同收非聯招生就鬼咁熱心。學校認錢唔認人，提倡因材施教、有教無類嘅孔夫子如果泉下有知，肯定激到大嗌「吾不欲觀之矣」！
都係嗰句，教育不公係最大嘅不公，基層孩子輸在人生起跑線上，仲講咩向上流動，仲講咩解決跨代貧窮吖，叮！
