俄羅斯首富奧斯曼諾夫投資科網股嘅眼光一向準繩,佢話旗下嘅資產管理公司USM Advisors已同facebook(fb)講Bye bye,減持fb股票,新歡係依家炒得熱火朝天嘅阿里巴巴,佢仲話喺阿里嘅投資勁增咗五倍多,但究竟佢揸咗幾多?佢就賣個關子:「唔算多,夠使咁囉。」

奧斯曼諾夫

想當年,fb創辦人朱克伯格為咗賣股畀俄首富,割愛自己嘅投票權,俄首富入股價相當於fb嘅估值60億至100億美元,佢同合夥人共買咗fb約10%股份,今時今日fb市值已經超過2,000億美元,但估唔到奧斯曼諾夫喺勁賺之後,竟然撇低一句:「我尊敬fb,但我要同fb講拜拜。」言下之意,首富已經貪新忘舊。咁佢又啱,投資呢啲嘢,係要見好就收嘅。

除咗阿里之外,奧斯曼諾夫亦睇好中國低成本智能手機製造商小米,認為佢係「未來嘅科技巨人」。

另外,奧斯曼諾夫對於印度科網股都好有信心,尤其係網上交易平台。佢認為新興市場依家仍然被低估。唔知小米同印度科網股會唔會成為首富先生嘅下一任新寵呢?

第一手消息請下載on.cc東網iPhone/iPad/Android/Windows Phone Apps