城中鏡：吳永嘉買茅台股「對沖」酒錢
買股票對沖花費，係唔少股民嘅智慧。例如買港鐵股票，就可以透過派息分紅，分享加價的甜頭，減輕作為乘客對加票價的肉痛感。鍾意飲茅台酒嘅中華廠商聯合會副會長Jimmy吳永嘉，多年嚟使咗唔少錢買茅台，最近趁滬港通實施首日，急不及待用六位數字掃入茅台A股，認真識計數。
林凱章（中）同霍啟山（右）瞓身籌備晚宴，福建社團聯會副主席黃楚恒（左）到場為兄弟打氣。
吳永嘉（左）同菁英會執委鄺晶晶齊歡聚。
裕華國貨後人余偉傑，大刀闊斧搞門面裝修。
早前廣東社團總會青委舉行十一周年晚宴，Jimmy有到場。佢睇好茅台酒價格近年跌至低位，係時間入股票。咁佢用乜價位入貨？佢話唔記得，交畀經紀話事喎！汕頭商會會長葉振南都心儀茅台股票，但外圍市況波動，要睇定啲先。佢睇好人民幣喺香港取消兌換限制後，銀行高息搶客，佢都想存埋一份！
余偉傑冀大執佐敦裕華
講番當日活動，青委主任Victor林凱章拍住籌委會主席Eric霍啟山搞派對，多個青年團體領袖雲集，包括全國青聯副主席陳仲尼、茅台之友協會青委主任莊家彬、菁英會主席梁宏正等。大家話題離唔開疏導年輕人怨氣。Eric話前進唔可以一步登天，要喺理想同現實中知進退。Victor鼓勵年輕人睇多啲、學多啲，眼光開闊，自然搵到新天地。
裕華國貨董事長余國春兒子余偉傑都喺度，佢曾幫新加坡打理投資基金，舊年二月返港接掌家族生意，依家喺裕華擔任總監，上任頭炮就係要搞佐敦裕華大裝修！
