政壇：立會貴價鐵馬夠硬淨
有一批示威者上周突然衝擊立法會大樓，結果撞爛至少兩塊玻璃，事後被形容為暴徒行為，當時示威者不停用有立法會標誌嘅鐵馬向玻璃撞擊，撞咗至少五分鐘先被擊碎。據知立法會鐵馬同警方慣用由生鐵製造嘅鐵馬唔同，前者特點係不銹鋼，硬度高，重量輕，方便搬運，不過盛惠三千七百元，比起普通幾百元嘅鐵馬貴好多。
立法會嘅不銹鋼鐵馬比生鐵做嘅鐵馬硬度較高，兼且重量較輕。（資料圖片）
有立法會保安賽後總結，指不銹鋼鐵馬較警方鐵馬嘅硬度為高，今次立法會防撞玻璃能夠抵受連續數分鐘，數十次嘅猛烈衝擊，可以話交足功課。至於點解最終立會防撞玻璃都係被擊碎，有知情人士分析，示威者一開始用不銹鋼鐵馬撞擊時，該塊玻璃係絲毫無損，唯獨有人拎起硬石掟埋塊玻璃，先出現破裂紋同破洞，加上部分示威者後期繼續用不銹鋼鐵馬撞向玻璃裂紋位置，否則單靠鐵馬撞擊，應該唔能夠擊碎玻璃喎。
