政壇：星展物色代言人 潘燕明奉旨追星
咪以為Banker一日24小時只係識得留意個市，原來有人仲好緊貼娛樂圈動向，佢就係嚟自新加坡嘅女Banker、星展香港區零售銀行業務及財富管理總監Pearlyn潘燕明，因為佢成日要為星展物色代言人，所以都好熟「行情」！
潘燕明今年係第一年喺香港過聖誕。（資料圖片）
Pearlyn話佢一樣喜歡靚仔，最記得嘅當然係合作過嘅「男神」古天樂同吳彥祖，但對兩位大小「天后」容祖兒Joey同G.E.M.一樣讚不絕口。
講到星展早前搞Annual Dinner請咗容祖兒做嘉賓，Pearlyn就急不及待拎手機出嚟Show佢哋嘅合照，大讚Joey一啲都無擺過天后款，仲落台同一大班星展同事們去影相。
至於G.E.M.，Pearlyn就話小巨肺好有才華，好彩喺佢仲未上「我是歌手」前已經搵咗佢做星展代言人，真係好抵咁話！
